Sawal: najaasat ki tareef kiya hai?
Jawab: najaasat ki 2 iqsaam hain ek nijasat e khafifa aur dosri nijasat e ghaliza.
1) najasat e khafifa: ye aisi najasat hai jis mein halal janwaron ka peshab kapray k chothai hissay tak muaaf hai aur kapray ka her hissa alag shumaar hota hai daaman alag hissa hai aasteen alag hissa hai is liye sub ka chothai hissa b alag shumar hoga aur muaaf honey ka matlab ye hai k is halat mein namaz parh li jaey to namaz ho jaey gi dobara lotaaney ki zarurt nahi magr najasat ka door karna aur kapray ko paak karna bhi zaruri hai.
2) najasat e ghaliza: ye aisi najasat hai jis mein admi ka pakhana, peshab, sharab, khoon, janwaron ka gober, aur haram janwaron ka peshab wagera shamil hain ye agr siyal behny waly hon to ek rupay (jo bara wala ek rupay ka sikka hai) k phelao k brabar muaaf hain aur agr garha maada ho to 5 maashey wazan jitna muaaf hai is se zyada ho to namaz na hogi.
Sawal: dair tak peshaab k qatray aaney walon k liye paaki hasil karny ka tariqa kiya hoga?
Jawab: jis shakhs ko ye marz lahaq ho k dair tak usay qatray atey rehty hain usay paani se istanjja karny se pehly lazmi pathar ya tissue ka istemal karna chahye jab itmenaan ho jaey phir paani se istanjja kary.
Sawal: hawa nikal janey ki surat mein kiya istanjja bhi lazim ho jata hai?
Jawab: jii nahin hawa nikalney ki surat mein sirf wuzoo lazim aata hai istanjja karna sahi nahin hai agr hawa k sath kuch najast nikal gai ho tab istanjja bhi lazim hai.
Sawal: sheer khwaar bachy ka peshab paak hai ya naa paak?
Jawab: itny bachy ka peshab bhi naa paak hota hai is liye us jagah ya kapray ko paak karna zaruri hai.
Sawal: kapray aur bartan paak karny ka tareeqa?
Jawab: kapra ya bartan agr naa paak ho jayen to 3 baar saaf paani se dho leny se ye paak ho jaty hain kapray ko 3 baar nichor kar dhona hoga.
Sawal: roi aur foam ka gadda paak karny ka tariqa kiya hai?
Jawab: aisi cheez jis ko nichorna mumkin na ho is k paak karny ka tariqa ye hai k us ko dho kar rakh diya jaey yahan tak k us se qatry tipakna band ho jayen is tarah us cheez ko 3 baar dho liya jaey to wo paak ho jaey gi.
Sawal: kiya naa paak insan agr bartan ya kisi aur cheez ko hath laga le to woh naa paak ho jaey gi?
Jawab: jab tak naa paak insan k haath pe koi zaahiri najasat lagi na hogi to us k kisi bhi cheez ko haath lagany se woh cheez naa paak nahi hogi.
Sawal: kapray dhoty huy jo chinten urti hain woh paak hain ya naa paak?
Jawab: agr kapra naa paak hoga to lazmi tor pe dhotey huy uski urti cheenten b naa paak hongi un se bachna zaruri hai aur paak kapray ki cheentain paak hoti hain.
Sawal: bachy ka peshab agr farsh ya zameen pe sokh jaey to uska hukum kiya hai?
Jawab: agr bachy ka peshab zameen ya farsh pe sookh kar mukamal khatm ho jaey to woh jaga paak hogi aur wahan kapra bichaey bina b namaz parh sakty hain.
Sawal: kisi cheez k paak ya naa paak hony mein shak ho to uska kiya hukum hai?
Jawab: agr yaqeen zyada ye ho k paak hai to usay paak samjha jaey aur shetaani wasawis pe dehan na dein aur jis cheez ka ghalib gumaan ho k naa paak hai woh naa paak hogi.
Sawal: kuttay aur billi k badan se agr kapray choo jaeyen to kiya hukum hai?
Jawab: kuttay aur billi k jism se agr kapray wagera choo jayen to wo paak hongay chahey unka jism geela hee kyun na ho bus un k jism pe koi zaahiri najasat na lagi ho magr kuttay ka thook naa paak hai woh jis cheez pe lag gaya woh bhi naa paak ho jaey gi aur billi ka thook makrooh hai is liye dono k thook se bachna zaruri hai.
Paaki se mutaaliq aurton ke masail
Sawal: Haiz ki kam se kam muddat aur zyada se zyada muddat kiya hai?
Jawab: Haiz ki kam se kam muddat 3 din aur 3 raat hai aur zyada se zyada muddat 10 din aur 10 raat hai lekin agr 3 din se khoon kam aya sirf ek ya 2 din to woh haiz shumaar na hoga balkey woh istehaza hoga aur us din ki namaz qaza karna zaruri hogi aur agr isi tarah 10 din se zyada khoon aya to pichli daffa ki adat ko dekhna hoga k last time kitny din khoon aya tha agr jesy last time 6 ya 7 din khoon aya tha to itny din is baar bhi haiz ke hongay aur is se ooper jitny din khoon ayega woh istehaza ka khoon hoga jis mein namaz wgera parhna farz hai aur istehaza woh khoon hota hai jo kisi bemari ki wajah se aata ho.
Sawal: kiya aurat naa paaki k ayaam mein naha sakti hai?
Jawab: jii haan aurat naa paaki k ayaam mein naha sakti hai magr ye nahana paaki k liye na hoga.
Sawal: kiya haiz se paak hony ki koi ayat hai?
Jawab: jii nahin na paak insan paani se paak hota hai ayaat aur kalmaat se nahin.
Sawal: haiz mein shohar se muqarbat?
Jawab: aisi halat mein biwi se milna na jaiz haraam aur gunah e kabeera hai toba isteghfaar kary aur agr gunjaish hi to taqreeban 6 garam chandi ya is ki qeemat sadqa kary warna toba hee karta rahy magr is na jaiz amal se nikkah mein koi farq nahi parta magr aisi halat mein aurat k naaf se ghutnon tak k hissay ko bhi shohar ka haath lagana begair pardey k jaiz nahin.
Sawal: haiz k dino mein aurton k haath ka pakka khana khana jaiz hai ya nahin?
Jawab: zamana jaahiliyat mein ye mashoor tha lekin aisi koi baat nahin hai khana kha sakty hain aur tamam kaam jesy kapry dhona wagera sub jaiz hain.
Sawal: nifaas kisy kehty hain aur is ki kam se kam aur zyada se zyada muddat kiya hai?
Jawab: bacha peda hony k baad jo khoon aata hai usay nifaas kehty hain aur is ki kam se kam muddat koi nahin agr ek lamha khoon aa kar ruk jaey to wo nifaas hee kelata hai aur zyada se zyada muddat 40 din 40 raat hai agr 40 din se khoon zyada ayega to wo istehaza ka khoon hoga.
Sawal: haiz aur nifaas k ahkaam kiya hain?
Jawab: haiz aur nifaas mein namaz muaaf hai bad mein in ki qaza karny ki zarurt nahin jab k in ayaam mein roza muaaf nahin baad mein rozey ki qaza karna hogi aur tilawat e kalaam e paak jaiz nahin magr zikr e ALLAH aur darood shareef aur deegar duaein parhi jaa sakti hain aur wazaif aisy jin mein qurani ayaat na hon woh kar sakty hain.
Sawal: haiz ki halat mein mehndi lagana jaiz hai?
Jawab: haiz ki halat mein mehndi lagana jaiz hai.
Sawal: haiz k doran pehny huy kapron ka hukum?
Jawab: haiz k doran pehny huy kapry pak hoty hain agr nijasat lag gai ho to us hissay ko pak kar liya jaey wesy kapra paak hai.
Sawal: kiya haiz k dinon mein quran e pak ka tarjuma parhna ya arabic mein ahadees parhna jaiz hai?
Jawaz: dono kaam jaiz hain magr begair haath lagaey huy.
Sawal: imtehan k dino mein qurani surton ka jawab kis tarah likha jaey?
Jawab: tarjuma aur tashreeh likhny ki ijazat hai magr ayat e kareema ka mattan na likhy balkey ayat ka hawala de kar us ki tashreeh likh de.
