masail e tayammum

Sawal: tayammum ka tariqa kiya hai?

Jawab: tayammum ki niyat karna farz hai phir paak saaf matti per 2 baar haath maarna ek baar haath maar kar chehra pe pherna aur doosri baar haath maar kar dono baazo pe kohniyon samait haath pherna farz hai.

Sawal: tayammum karna kab jaiz hai?

Jawab: tayammum karna sirf 2 soorat mein jaiz hai (1) jab ek meel k ander paani muyasar na ho yaa paani mojood to ho magr istemaal na kar sakey jesy kunwaan ho magr paani nikaal na saky ya paani pe dushman ka qabza ho ya paani pe koi darinda betha ho aisi soorat mein tayammum kar sakty hen (2) doosri surat ye hai k paani mojood hai magr wazoo ya ghusal ki surat mein jaan ki halaakat ka ya bemari k barh janey ka ya jism k kisi hissay ko nuqsan pohnchney ka khatra ho ya khud wazoo aur ghusal karny se mazoor hai aur koi dusra admi wazoo aur ghusal karwany k liye mojood nahi aisi surat mein bhi tayammum jaiz hai.

Sawal: kiya wazoo aur ghusal k tayammum ka ek hee tariqa hai?

Jawab: jii haan wazoo aur ghusal k tayammum ka ek hee tariqa hai.

Sawal: tayammum kin cheezon se jaiz hai?

Jawab: tayammum paak matti se ho sakta hai ya jo cheez matti ki jins se ho aur lakri , kapra , loha jesi cheezon se tayammum nahi ho sakta lekin agr in cheezon per matti ya ghubaar para ho to tayammum jaiz hoga.

Sawal: kiya waqt ki tangi ki wajah se ghusal k bajaey tayammum jaiz hai?

Jawab: mehz waqt ki tangi ki wajah se tayammum karna jaiz nahi ghusal kar k namaz parhen aur agr waqt nikal jaey to qaza parhen albatta behtr ye hai k us waqt tayammum kar k namaz parh lein lekin baad mein ghusal kar k laazmi namaz parh lein.

Sawal: kis had tak beemar insan tayammum kar sakta hai?

Jawab: agr insan ki beemari ka taayun koi maahir doctor kary k paani se lazmi apko nuqsan hoga to aisa shakhs tayammum kar sakta hai.

Sawal: agr ghusal wajib ho to kiya her namaz k liye alag alag ghusal ka tayammum karna hoga?

Jawab: jii nahin ghusal wajib honey pe sirf ek baar ghusal ka tayammum kar lena kaafi hoga jab k her namaz k liye phir sirf wuzoo kiya jaeyga ya wuzoo per bhi qaadir na ho to wuzoo ki jagah bhi tayammum karta rahy.

Sawal: train k safar mein agr wuzoo k liye paani mojood na ho to kia tayammum jaiz hai?

Jawab: train mein paani dastayab na ho to tayammum jaiz hai magr shart ye hai k train k kisi dabbay mein bhi paani mojood na ho ya na mily aur ek meel k andar paani k mojood na honey ka bhi ilm ho jahan train rukti ho aur namaz ka waqt bhi khatm honey wala ho to aisi soorat mein tayammum jaiz hai.